Humanización

• Xerar espazos humanizados, acolledores, amigables, que fomenten a interacción social e conviden a desenvolver a maior parte das nosas actividades cotiás dentro dos campus.
• Mellorar as contornas das escolas e facultades, favorecendo espazos de encontro de alta calidade espacial que reforcen o sentimento de pertenza á Comunidade UDC.
• Artellar un plan de reforma, mantemento e mellora dos centros, que permita intervir de modo programado nos mesmos, previa análise do estado actual e o establecemento dun conxunto de criterios para articular a orde de intervención, impulsando a mellora da accesibilidade, a eficiencia enerxética e a sustentabilidade dos edificios da UDC e reducindo o gasto en avarías producidas por infraestruturas obsoletas. 
• Elaborar un plan de rehabilitación integral de centros especialmente obsoletos, que desenvolva estratexias integrais de intervención para cada un, establecendo fases de execución e, no seu caso, a previsión de fontes de financiamento.
• Elaborar un mapeamento social dos espazos comúns da UDC e da súa contorna, que permita identificar as problemáticas do ecosistema completo (espazos e habitantes) e orientar as accións a emprender.
• Reformar dun modo programado e paulatino as salas de lectura das bibliotecas, incorporando pequenas salas para traballo en grupo, con medios audiovisuais, espazos de uso persoal para traballos de alta concentración, e espazos chill out para fomentar a relaxación e o descanso, aproveitando a experiencia positiva dalgúns espazos, como o da biblioteca da ETSA.
• Buscar solucións para centros con falta de espazos, a través da ampliación de espazos xa existentes dentro do propio centro, da licitación de novas edificacións, de recolocación de titulacións ou servizos, e tamén valorando a posible formalización de convenios de cesións con outras administracións.
• Buscar edificios e espazos en desuso ou con baixa intensidade de uso para deseñar espazos abertos á comunidade UDC, en que poden interactuar diferentes colectivos.
• Abrir espazos ao desfrute cidadán, procurando a máxima integración dos campus na cidade e promovendo a declaración de espazos amables coas mascotas.
• Elaborar un diagnóstico de mobilidade nos campus e artellar alianzas con administracións e entidades clave para a mellora da mobilidade sustentable e activa.
• Facilitar os procedementos administrativos vinculados coa docencia, prestando atención especial ás dificultades que poidan provocar no estudantado estranxeiro e procurando asistencia ante as dificultades tecnolóxicas.
• Clarificar e simplificar as normas, que deben ser accesibles, coñecidas e comprendidas por todas as persoas, empregando, cando for necesario, manuais e guías de usuario.
• Mellorar o repositorio normativo, co fin de que a busca das normas vixentes sexa sinxela e o seu manexo intuitivo e áxil.
• Simplificar e mellorar os procedementos de xestión de todo tipo, académicos, económicos, de investigación e de calidade, analizándoos por equipos de traballo en que participen todos os sectores implicados (PDI, estudantes, servizos implicados na xestión, servizos informáticos, responsables do control…), e aspirando a que cada procedemento sexa un instrumento áxil, evitando obstáculos e simplificando os formularios. 
• Apoiar as persoas investigadoras na xestión dos proxectos de investigación, tanto no proceso de solicitude como durante a execución do proxecto.
• Implementación de estratexias de coordinación e xestión efectivas nos servizos de apoio a todo tipo de proxectos de investigación, docencia, transferencia e internacionalización.
• Avanzar no uso do galego como lingua habitual de comunicación na administración universitaria.
• Avaliar, desde o punto de vista do usuario, a páxina web institucional co fin de mellorar o seu deseño e visibilidade e poñela ao servizo da comunicación de toda a comunidade universitaria.
• Impulsar unha estratexia de comunicación entre a propia comunidade universitaria sobre a evolución de proxectos de importancia estratéxica para a UDC, como os centros de investigación, a Cidade das TIC, o futuro EI3 Edificio de Investigación e Innovación na Industria, o CEMI UDC-Navantia, ou o Campus Industrial de Ferrol, primeiro campus de especialización do SUG, ofrecendo información actualizada e accesible sobre as iniciativas, o estado de execución dos proxectos, os retos pendentes e os logros acadados. 
• Reforzar a comunicación cara ao exterior, coordinando os diversos canais institucionais dentro dunha estratexia de comunicación dirixida a conseguir mellores sinerxías e maior impacto.
• Planificar espazos, medios e contidos da información que deba ser posta a disposición da cidadanía, poñendo atención na información referida a toda a  actividade da UDC no eido da docencia, a investigación e a transferencia.
• Unificar a difusión  das actividades de divulgación e comunicación científica que sirva de ponte e conexión con todas aquelas que poidan ofertar os diferentes centros ou grupos de investigación da UDC.
• Realizar actividades divulgativas dirixidas ao público infantil e xuvenil, no ámbito escolar ou fóra del, incluída a realización de contidos divulgativos científicos dirixidos ao uso escolar, como libros científicos de uso infantil, xuvenil etc.
• Realizar actividades dirixidas á Universidade Sénior e a outro público sénior.
• Participar na realización de grandes eventos divulgativos que teñan un efecto multiplicador da visibilidade da UDC e que poñan en valor o traballo realizado na mesma.
• Promover espazos divulgativos en diferentes medios de comunicación con certa regularidade.
• Ofrecer formación para mellorar as habilidades comunicativas e divulgativas do noso persoal investigador en colaboración co CUFIE e do estudantado a través de microcréditos.
• Colaborar e realizar iniciativas conxuntas cos Museos Científicos Coruñeses e o MUNCYT e outras entidades con participación activa en actividades de divulgación.
• Fomentar a lingua galega como instrumento de divulgación e comunicación científica.
• Fomentar a ciencia cidadá.
• Manter NORMAL como espazo de intervención cultural da UDC e dinamizar un espazo de intervención cultural no Campus de Ferrol.
• Poñer en valor as habilidades culturais do estudantado e da comunidade universitaria en xeral para promover a antecitada riqueza entre a nosa cultura universitaria e integrala na programación das nosas propias actividades.
• Fomentar o coñecemento da cultura galega entre estudantes internacionais, docentes visitantes etc.
• Impulsar convenios con entidades e asociacións de promoción e coñecemento da cultura galega.
• Fomentar o coñecemento do patrimonio cultural da UDC.
• Recoller, catalogar e poñer accesibles á cidadanía as diferentes pezas artísticas ou fondos bibliográficos de riqueza museográfica ou de valor cultural da propia universidade.
• Poñer en valor o contexto cultural da localización da UDC.
• Potenciar as actividades no medio natural e os roteiros a pé, especialmente polas contornas dos nosos campus, como o Monte da Fraga e o Castro de Elviña, en colaboración co Concello da Coruña, combinando deporte, cultura e divulgación.
• Fomentar a actividade física e o deporte como medio para mellorar a saúde individual e comunitaria.
• Fomentar actividades para dinamizar e facer comunidade universitaria, como celebracións deportivas con deportes minoritarios ou cooperativos entre os diferentes axentes universitarios.
• Fomentar a actividade física e o deporte inclusivo, en colaboración con outros servizos, entidades ou asociacións.
• Potenciar as redes deportivas universitarias e colaborar con outras universidades, a nivel galego, nacional e europeo.
• Potenciar os programas “UDC Actívate”, “Actívate +” e “Pausa en movemento”, dirixidos a mellorar o estado físico dos membros da comunidade universitaria.
• Adaptar “Espazos Activos Saudables” (aulas EAS) nos distintos centros de forma gradual.
• Crear unha comunidade universitaria activa creando espazos no campus para a práctica deportiva ao aire libre, fomentando e dinamizando o coñecemento da contorna universitaria.